دمعك مش خطيئة

دمعك مش خطيئة

كل ما المح جوا عيونك .. دمعة مسجونة .
أثور .. جوايا تصرخ صرخة مجنـــونة .
صرخة تلعن كل اللى احنا اتعلمناه .
ان الراجل .. موته أهون من بكاه .
مع إن الطفل لحظة ميلاده بيبكى ..
أول مـــــــا يـخـــرج للـــحــيــاة .
ومش مهم ..
نوعه إيه .. أو جنسه إيه ..
المهم ان الـبكـى مولـود معــاه .
يبقى ليه تسجن بكاك ..
عشان أفكار قاسية وملعونة .
************
ابكى يا عمرى فوق صدرى ..
ولا يهمك .
ابكى وقلبى بكل مشاعره هيضمك .
ما تفتكرش .. إن بكاك يعنى انكسار .
وما تصدقش .. إن دموع الراجل عار .
دا انت سجنك للبكى .. يعنى انتحار .
ابكى وما تزودش بصمتك .. همى وهمك .
***************
عمر البكى .. ما يكون خطيئة .
وزى الحزن ما هو حقيقة .
أكيد دموعنا حق لينا ..
مــا احنا بشر .
ومين اللى يحكم ..
ان قلوبنا تكون حجر.
مين اللى يحرم السما ..
تبكى مطـــــــــــر .
دا احنا بشر ..
ودمعنا أكبر حقيقة .
ابكى يا عمرى ..
لإن دمعك مش خطيئة .
**********